തീരോല്‍സവം...
തീരദേശ ജാഗ്രതാ സമിതിയുടെ രണ്ടാം വാര്‍ഷികത്തോടനുബന്ധിച്ച് മുനക്കല്‍ ബീച്ചില്‍ ഫെബ്രുവരി 27 ഞായറാഴ്ച തീരോല്‍സവം നടത്തുന്നു.
കഴിഞ്ഞ ബീച്ച് ഫെസ്റ്റിവല്‍ നടത്തിപ്പില്‍ സാമ്പത്തിക ക്രമക്കേടുകള്‍ നടന്നതായി നിരവധി ആരോപണങ്ങള്‍ ഉയര്‍ന്നിരുന്നു. ഫെസ്റ്റിവലിന് ശേഷം ഡിസ്ട്രിക്റ്റ് ടൂറിസം പ്രൊമോഷന്‍ കൌണ്‍സില്‍ മുമ്പാകെ കണക്കുകള്‍ അവതരിപ്പിച്ചില്ല എന്നതായിരുന്നു അവയില്‍ പ്രധാനം . അഴീക്കോട്‌ സര്‍വീസ് സഹകരണ ബാങ്കില്‍ നടന്ന തിരിമറികളും അതേ തുടര്‍ന്ന് അന്നത്തെ ബാങ്ക് പ്രസിഡണ്ടിനു തല്‍ സ്ഥാനം നഷ്ടപ്പെട്ടതും ഫെസ്റ്റിവല്‍ നടത്തിപ്പുമായി ബന്ധപ്പെട്ടു തന്നെയായിരുന്നു. പഞ്ചായത്ത് തെരഞ്ഞെടുപ്പിന്‍റെ തിരക്കുകളും ഫെസ്റ്റിവല്‍ നടക്കാതിരിക്കാന്‍ കാരണമായി.
കൊടുങ്ങല്ലൂര്‍ പോലീസിന്‍റെ ആശീര്‍വാദത്തോടെ പ്രവര്‍ത്തനമാരംഭിച്ച തീരദേശ ജാഗ്രതാ സമിതിയുടെ രണ്ടാം വാര്‍ഷികത്തോടനുബന്ധിച്ചാണ് തീരോല്‍സവം നടത്തപ്പെടുന്നത്.വിശിഷ്ട സേവനത്തിനു മുഖ്യമന്ത്രിയുടെ പുരസ്കാരം നേടിയ കൊടുങ്ങല്ലൂര്‍ C .I ശ്രീ കെ.എം ദേവസ്യക്ക്‌ ഉപഹാരം സമര്‍പ്പിക്കലാണ് പ്രധാന പരിപാടി. തുടര്‍ന്ന് ചവിട്ടു നാടകം , ഗാനമേള എന്നിവയും ഉണ്ടാകും.
കൊളുത്ത് ...
1 . അഴീക്കോട്‌ സര്‍വീസ് സഹകരണ ബാങ്കിന്‍റെ ഒരു ലെഡ്ജറില്‍ 'ആരോ' 4000 രൂപ വെട്ടിത്തിരുത്തി എഴുതി...
പഞ്ചായത്ത് തെരഞ്ഞെടുപ്പ് കഴിഞ്ഞപ്പോള്‍ കുറെ കോണ്ഗ്രസ്സ്കാര്‍ അണ്ടി പോയ അണ്ണാന്മാരായി....
2 സി.ഐ ക്ക് അഭിനന്ദനം അര്‍പ്പിച്ചു നാട് മുഴുവന്‍ ഇറങ്ങിയ എല്ലാ ഫ്ലക്സ്കളിലും ഒരേ ഫോട്ടോ തന്നെയാണത്രേ ഉള്ളത്. അത് C.I അദ്ദേഹം കൊടുക്കുന്നത് തന്നെയെന്നാ അസൂയക്കാരുടെ സംസാരം...
3 .കൊടുങ്ങല്ലൂരില്‍ സമാധാനാന്തരീക്ഷം പുനസ്ഥാപിക്കപ്പെട്ടത്‌ S . I ശ്രീ ബാലചന്ദ്രന്‍റെ ധീരമായ നടപടികള്‍ മൂലമാണെന്ന് പ്രഖ്യാപിച്ച്‌ അദ്ദേഹത്തിന് അഭിവാദ്യം അര്‍പ്പിച്ച് ചില യുവാക്കള്‍ സ്ഥാപിച്ച ഫ്ലെക്സ് ബോര്‍ഡ് 'ഏതോ' ചില അക്രമികള്‍ നശിപ്പിച്ചു.

ഉത്ഘാടന മഹാമഹം...

നാട്ടില്‍ ഉത്ഘാടനങ്ങളും ശിലാസ്ഥാപന കര്‍മങ്ങളും പൊടിപൊടിക്കുന്നു.

കഴിഞ്ഞ 15 ദിവസത്തിനിടെ കൊടുങ്ങല്ലൂര്‍ മണ്ഡലത്തില്‍ മാത്രം ശ്രീ കെ.പി.രാജേന്ദ്രന്‍ ഇരുപതോളം പൊതു പരിപാടികളില്‍ പങ്കെടുത്തു കഴിഞ്ഞു. കല്ലിടലുകളുടെയും നാട മുറിക്കലുകളുടെയും വിവരങ്ങള്‍ അറിയിച്ചുകൊണ്ടുള്ള പുതിയ പുതിയ കമാനങ്ങള്‍ ഓരോ ദിവസവും ഉയര്‍ന്നു കൊണ്ടിരിക്കുന്നു. ഇവയില്‍ പകുതിയെങ്കിലും അടുത്ത സര്‍ക്കാരിന് പൂര്‍ത്തീകരിക്കാന്‍ സാധിച്ചാല്‍ നമ്മുടെ നാട് കേരളത്തിലെ സ്വപ്ന ഭൂമിയാകും. ഈ കൂട്ടപ്പൊരിച്ചിലിനിടയില്‍ പഞ്ചായത്ത് തെരഞ്ഞെടുപ്പു വേളയില്‍ നല്‍കിയ വാഗ്ധാനങ്ങള്‍ അദ്ദേഹം മറക്കില്ലെന്ന് കരുതാം. വര്‍ഷങ്ങളായി തകര്‍ന്നു കിടക്കുന്ന അഴീകോട് ജെട്ടി - മാര്‍ത്തോമ റോഡ്‌ പുനര്‍ നിര്‍മിക്കണം എന്നാവശ്യപ്പെട്ടു പഞ്ചായത്ത് തെരഞ്ഞെടുപ്പു ബഹിഷ്കരിക്കാന്‍ തീരുമാനിച്ച പ്രദേശവാസികള്‍ക്ക് മന്ത്രി നേരിട്ടെത്തി നല്‍കിയ ഉറപ്പ് ഇതുവരെ പാലിക്കപ്പെട്ടിട്ടില്ല. രൂക്ഷമായ കുടിവെള്ള ദൌര്‍ലഭ്യം അനുഭവിക്കുന്ന നമ്മുടെ നാട്ടില്‍ ഇപ്പോഴും ആഴ്ചയിലൊരിക്കലാണ് പൈപ്പ് വെള്ളമെത്തുന്നത് .നാളുകള്‍ക്കു മുന്‍പ് ഫ്രാന്‍സിസ് ചേട്ടന്‍ സ്ത്രീകളെ പങ്കെടുപ്പിച്ചു സമരം നടത്തിയപ്പോള്‍ മന്ത്രി നല്‍കിയ വാഗ്ദാനവും ഇതുവരെ പാലിക്കപ്പെട്ടിട്ടില്ല. നാടിന്റെ ഇത്തരം നീറുന്ന പ്രശ്നങ്ങളെല്ലാം പരിഹരിക്കപ്പെടും എന്ന് നമുക്ക് പ്രത്യാശിക്കാം. ഒരുപാട് പേരെ നമ്മള്‍ നിയമസഭയിലേക്കയച്ചു. നാടിനു വേണ്ടി കൂടുതല്‍

കാര്യങ്ങള്‍ ചെയ്തത് ശ്രീ രാജേന്ദ്രന്‍ തന്നെ...

കൂടുതല്‍ വാഗ്ദാനങ്ങള്‍ തന്നതും...

'ചീനവലകളെ ' സ്നേഹിക്കുന്നവരുടെ അഭിനന്ദനങ്ങള്‍...

കൊളുത്ത്‌...
രാത്രി പുറത്തിറങ്ങി നടക്കുന്നവര്‍ പ്രത്യേകം ശ്രദ്ധിക്കുക . ടോര്‍ച്ച് കരുതിയില്ലെങ്കില്‍ മന്ത്രി വഴിയില്‍ വിതറിയ ഏതെങ്കിലും കല്ലില്‍ തട്ടി വീഴാനിടയുണ്ട്...

ഭൂമിക്കച്ചവടം വീണ്ടും സജീവമാകുന്നു...
ഏതാനും വര്‍ഷങ്ങളായി നിര്‍ജീവമായിരുന്ന ഭൂമിക്കച്ചവട രംഗം നാട്ടില്‍ വീണ്ടും സജീവമാകുന്നു. നാലഞ്ചു വര്‍ഷങ്ങള്‍ക്കു മുന്‍പ് നമ്മുടെ നാട്ടില്‍ ഏറ്റവുമധികം പണമൊഴുകിയിരുന്ന ഒരു മേഖലയായിരുന്നു ഇത്. വീട് വെച്ച് താമസിക്കുന്നതിനായി സ്ഥലം വാങ്ങുക എന്നതൊരു പഴഞ്ചന്‍ സങ്കല്പ്പമായി മാറി. അഡ്വാന്‍സ് തുക മാത്രം മുടക്കി 6 മാസത്തെ കരാറില്‍ ഭൂമി വാങ്ങി മറിച്ചു വില്‍ക്കുക വഴി നല്ല ലാഭം പലര്‍ക്കും ലഭിച്ചതോടെ നിരവധി പേര്‍ ഈ രംഗത്തേക്ക് കടന്നു വന്നു. ഒരുപാടു പേര്‍ ഇടനില്‍ക്കാരായും അവതരിച്ചു. ഈ മാറ്റം സാധാരണക്കാര്‍ക്ക് നാട്ടില്‍ ഭൂമി വാങ്ങി വീട് വെച്ച് താമസിക്കാന്‍ കഴിയാത്ത തരത്തില്‍ കാര്യങ്ങള്‍ കൊണ്ടെത്തിച്ചു എങ്കിലും ഒരുപാടു പേര്‍ക്ക് ഇതൊരു ഉപജീവന മാര്‍ഗം കൂടിയായിരുന്നു. ഊഹക്കച്ചവടം പരിധി വിട്ടപ്പോള്‍ സര്‍ക്കാര്‍ രെജിസ്ട്രേഷന്‍ നിയമങ്ങള്‍ കര്‍ശനമാക്കി. ഭൂമിക്കു ന്യായവില നിശ്ചയിച്ചു. ഇതോടെ ഭൂമിക്കച്ചവടം നിലച്ച മട്ടായി. കൂടാതെ ലോകം മുഴുവന്‍ സാമ്പത്തിക മാന്ദ്യത്തില്‍ അകപ്പെട്ടതോടെ ഗള്‍ഫില്‍ നിന്നുള്ള പണമൊഴുക്കിന്റെ തോതും കുറഞ്ഞു. അഴീക്കോട്‌ നടന്നിരുന്ന കച്ചവടങ്ങളില്‍ ഏറിയ ശതമാനവും ഗള്‍ഫ് മണിയുടെ പിന്‍ബലത്തിലായിരുന്നു. എന്നാലിപ്പോള്‍ ഈ മേഖല വീണ്ടും ഉണര്‍ന്നു തുടങ്ങുകയാണ്. സംസ്ഥാനത്ത് 2 മാസങ്ങള്‍ക്കകം നിയമസഭാ തെരഞ്ഞെടുപ്പു നടക്കും. പതിവനുസരിച്ച് അടുത്തത് യു.ഡി.എഫ്. ഭരണമായിരിക്കുമെന്നു പലരും കണക്കു കൂട്ടുന്നു. ഇത്തരം വിഷയങ്ങളില്‍ യു.ഡി.എഫ്. സാധാരണ ഉദാര സമീപനമാണ് പുലര്‍ത്തിപ്പോരുന്നത്. കൂടാതെ സാമ്പത്തിക ഞെരുക്കത്തില്‍ നിന്നും ഗള്‍ഫ് രാജ്യങ്ങള്‍ പതുക്കെ മോചിതമായിത്തുടങ്ങുന്നു. എന്ന വാര്‍ത്തകളും വരുന്നു. നാട്ടിലെ ഇടനിലക്കാരില്‍ നിന്നും കിട്ടിയ കണക്കനുസരിച്ച് ഈ വര്‍ഷം അഴീക്കോട്‌ ഇതുവരെ അന്‍പതിനടുത്ത്‌ കച്ചവടങ്ങള്‍ നടന്നിട്ടുണ്ട്. നാട്ടില്‍ ലീവില്‍ വരുന്ന ഗള്‍ഫുകാരെ ബ്രോക്കര്‍മാര്‍ വട്ടമിട്ടു പറന്നു തുടങ്ങിയിട്ടുണ്ട്. മറ്റു പല തൊഴിലുകളിലേക്കും യുവ തലമുറ കടന്നു ചെല്ലുന്നില്ലെങ്കിലും ഭൂമിക്കച്ചവട രംഗത്തേക്ക് പരമ്പരാഗത ബ്രോക്കര്‍മാരോട് മത്സരിക്കുവാന്‍ യുവതലമുറ സജീവമായിത്തന്നെ മുന്നോട്ടു വരുന്നുണ്ട്...

'SAAS'ല്‍ തീപിടുത്തം...
അഴീക്കോട്‌ സീതി സാഹിബ് ഹൈസ്കൂളിന് എതിര്‍ വശത്ത് പ്രവര്‍ത്തിച്ചു വരുന്ന വീഡിയോ ക്യാസറ്റ് ലൈബ്രറി 'SAAS'ല്‍ കഴിഞ്ഞ

ദിവസം രാത്രി തീപ്പിടുത്തമുണ്ടായി. തൊട്ടടുത്ത കടക്കാരന്‍ അനില്‍ രാവിലെ കട തുറക്കാനെത്തിയപ്പോള്‍ ക്യാസറ്റ് കടയില്‍ നിന്നും പുക ഉയരുന്നത് കണ്ടതിനെത്തുടര്‍ന്ന് ചില്ലുപൊട്ടിച്ച് അകത്തുകടന്നു തീ അണക്കുകയായിരുന്നു.
അഴീക്കോട്‌ പ്രദേശത്തെ ആദ്യകാല വീഡിയോ ക്യാസറ്റ് ലൈബ്രറിയാണിത്. അത്യപൂര്‍വ സിനിമകളുടെ ശേഖരങ്ങള്‍ ഇവിടെയുണ്ട്. നാശനഷ്ടങ്ങളുടെ കണക്കെടുത്ത് വരുന്നതേയുള്ളൂ. ഫയര്‍ എന്‍ജിനു വേണ്ടി കാത്തിരുന്നു എങ്കില്‍ ആ പ്രദേശമാകെ ചാമ്പലായേനെ എന്ന് നാട്ടുകാര്‍ അഭിപ്രായപ്പെട്ടു.

അഴീക്കോട്‌ ക്രിമിനലുകള്‍ വീണ്ടും തലപൊക്കുന്നു...

കൊടുങ്ങല്ലൂര്‍ പോലീസിന്റെ ശക്തമായ ഇടപെടലുകളെ തുടര്‍ന്ന് ശാന്തമായിരുന്ന അഴീകോട്, ജനങ്ങളെ ഭീതിയിലാഴ്ത്തിക്കൊണ്ട് ക്രിമിനലുകള്‍ വീണ്ടും സജീവമാകുന്നു.

ഹാജി കോപ്ലെക്സ് പരിസരത്ത് താമസിക്കുന്ന ശ്രീ അബുവിന്റെ മകന്‍ റെഷീദ് ഇന്നലെ രാത്രി പതിനൊന്നു മണിയോടെ എറിയാടുനിന്നും ബൈക്കില്‍ വീട്ടിലേക്കു പോകുന്നവഴി ജമാഅത്ത് പള്ളിയോടു ചേര്‍ന്നുള്ള സ്വന്തം പലചരക്ക് കടക്കു മുന്നിലുള്ള ഹമ്പില്‍ വേഗത കുറച്ചപ്പോള്‍ രണ്ടുപേര്‍ ചാടി വീണു വണ്ടിയുടെ ചാവിയും മൊബൈല്‍ ഫോണും പോകറ്റില്‍ നിന്ന് നാലായിരം രൂപയും അപഹരിക്കുകയായിരുന്നു.പോലീസ് കേസെടുത്ത് അന്വേഷണം ആരംഭിച്ചു.

ബജറ്റില്‍ പ്രതീക്ഷയര്‍പ്പിച്ച് നാട്ടുകാര്‍...

അഴീക്കോട്‌ മുനമ്പം പാലം പണിയുമായി ബന്ധപ്പെട്ട നാടകീയ സംഭവങ്ങള്‍ക്കൊടുവില്‍ നാട്ടുകാര്‍ സംസ്ഥാന ബജറ്റില്‍ പ്രതീക്ഷയര്‍പ്പിച്ച് കാത്തിരിക്കുന്നു. ശ്രീ ഉമേഷ്‌ ചള്ളിയില്‍ MLA യായിരുന്ന കഴിഞ്ഞ UDF ഭരണകാലത്താണ് അഴീക്കോട്‌ മുനമ്പം പാലത്തെക്കുറിച്ച് സജീവ ചര്‍ച്ച നാട്ടില്‍ ആരംഭിക്കുന്നത്. അന്ന് സര്‍വെ ജോലികള്‍ക്കായി 15 ലക്ഷം രൂപ ടോക്കന്‍ മണി എന്ന പേരില്‍ ബജറ്റില്‍ വകയിരുത്തിയിരുന്നു. എന്നാല്‍ പാലം പണിയില്‍ കാര്യമായ പുരോഗതിയുണ്ടായില്ല. തുടര്‍ന്നു വന്ന LDF ഭരണത്തില്‍ സ്ഥലം MLA യും റവന്യു മന്ത്രിയുമായ ശ്രീ K.P.രാജേന്ദ്രന്‍ മണ്ഡലത്തില്‍ നല്‍കിയിരുന്ന നിരവധിയായ വാഗ്ധാനങ്ങളില്‍ ഈ പാലവും പലതവണ ഉള്‍പ്പെട്ടിരുന്നു. ഇതിനിടെ പാലം പണി എന്ന ആവശ്യം ഉയര്‍ത്തിപ്പിടിച്ചു പല ആക്ഷന്‍ കൌന്‍സിലുകളും രൂപമെടുത്തെങ്കിലും ലക്ഷ്യ പ്രാപ്തി കൈവരിക്കാതെ പിരിച്ചുവിടപ്പെടുകയായിരുന്നു .
2010 ഡിസംബര്‍ 27 നു ശ്രീ.ടി.എന്‍.കുഞ്ഞുമൊയ്തീന്‍,കടപ്പൂര് അബ്ദുറഹ്മാന്‍,അയ്യൂബ് മാസ്റ്റര്‍ തുടങ്ങിയവരുടെ നേതൃത്വത്തില്‍ രൂപമെടുത്ത പുതിയ ആക്ഷന്‍ കൌണ്‍സില്‍ വിവരാവകാശ നിയമ പ്രകാരം ശേഖരിച്ച രേഖകളനുസരിച്ച് ഇത്രയും കാലമായിട്ടും യാതൊരു പുരോഗതിയും പാലം പണിയുടെ കാര്യത്തില്‍ ഉണ്ടായിട്ടില്ല എന്ന് ജനങ്ങള്‍ തിരിച്ചറിഞ്ഞു. തുടര്‍ന്നു സീതിസാഹിബ് ഹൈസ്കൂളില്‍ വെച്ച് നടന്ന സമരപ്രഖ്യാപന കണ്‍വെന്‍ഷനില്‍ വലിയ ജനാവലിയെ സാക്ഷിയാക്കി ,സംസ്ഥാന ബജറ്റില്‍ തുക ഉള്‍ക്കൊള്ളിക്കാം എന്ന് മന്ത്രി ഉറപ്പു നല്‍കി. കൊടുങ്ങല്ലൂര്‍ പോലീസ് മൈതാനത്ത് ഏകദിന ഉപവാസം നടത്തിക്കൊണ്ടു സമര പരിപാടികളുമായി ആക്ഷന്‍ കൌണ്‍സില്‍ മുന്നോട്ടു പോയി. ആക്ഷന്‍ കൌണ്‍സില്‍ കോണ്‍ഗ്രസ്സിന്റെ ചട്ടുകമാണെന്ന ആരോപണം ഇതിനിടെ ഉയര്‍ന്നു. ഇക്കഴിഞ്ഞ 5നു ചാമാക്കാലയില്‍ നിന്ന് അഴീക്കോടേക്ക് ആക്ഷന്‍ കൌണ്‍സില്‍ പദയാത്ര ആരംഭിക്കാനിരിക്കെ വളരെ നാടകീയമായി രാവിലെ 8.30 നു ശ്രീ രാജേന്ദ്രന്‍ അഴീക്കോട് ജെട്ടിയില്‍ എത്തുകയും പഞ്ചായത്ത് കമ്മറ്റി കൂടുന്നതിനിടയില്‍നിന്നും പഞ്ചായത്ത് പ്രസിഡണ്ടിനെ ജെട്ടിയിലേക്ക് വിളിച്ചു വരുത്തി ഭരണാനുമതി കൈമാറുകയുമായിരുന്നു. ശ്രീ.തോമസ്‌ ഐസക് ഇന്ന് നിയമ സഭയില്‍ ബജറ്റ് അവതരിപ്പിക്കുമ്പോള്‍ അഴീക്കോടുകാര്‍ വലിയ പ്രതീക്ഷയിലാണ്.നാടിന്റെ സ്വപ്നം പൂവണിയുമോ...